我的第一個母親節

我的第一個母親節，其實一個字講完：忙！

一早起身餵奶，煲中午餐粥，清潔玩具Playmat，然後和嫲嫲一邊飲茶一邊餵粥，之後上Baby Gym，上完堂在Gym食埋下午茶支奶，回家嗱嗱聲煲夜晚餐粥，幫小姐沖涼扮靚靚，又再一次出發，和婆婆一邊食晚飯一邊餵粥。

雖然我平日星期日都差不多咁忙，不過通常每日只會出一次街，either上午or下午，咁個schedule 就冇咁趕。另外，唔知好嬲定好笑，今次Baby Gym的主題是Role Model。好多動作要父母示範給BB看。要玩單槓，又要打筋斗。Instructor都話Mother's Day，叫爸爸們做多Ｄ。點知Mr 193今次放低我和米米先去泊車，仲要泊咗大半堂。我真係覺得勁揾笨～～～

而最冇癮的是米米爸爸零表示，我到夜晚都忍不住問佢。。。點知佢答米米咁細，係冇㗎啦！完全冇諗過要答謝第一年做媽媽的老婆，連咭都冇張。。。唉。。。

不過，自己做了媽媽，真的體會了做媽媽的辛勞。所以我都不介意辛苦一點走兩場，只要兩位媽媽都開心就好！至於米米爸爸，算吧，他其實已有盡力幫輕我，係唔識氹老婆囉～～～